شنو يعني تكون "سينيور"؟

الجزء الأول: السينيور مو بس كود

إحنا بعالم التِك، متعودين نربط كلمة "سينيور" بالشخص اللي حافظ لغة برمجة مثل اسمه، أو يعرف يسوّي تحسينات على الكود وهو مغمّض، أو فاهم CI/CD وMicroservices وClean Code.

بس خلّينا نكون صريحين… هاي كلها أدوات، مو الجوهر.

السينيور الحقيقي هو القائد الهادي.

هو الشخص اللي يعرف يشتغل كجزء من الفريق، مو كأنه يشتغل وحده ويعيش بدنيته.

السينيور هو اللي يعرف متى يحچي، ومتى يسكت ويخلي غيره يحچي.

يعرف إنو مو كل خطأ معناه فشل، مرات الخطأ هو فرصة للتعلم.

يعرف يسوّي مراجعة على الكود مو حتى ينتقد، بس حتى يساعد.

السينيور يسمع قبل لا يحچي

أقوى مطوّر ممكن يفقد احترام الناس إذا فرض رأيه بدون ما يسمع غيره.

بفريقك ممكن يكون عندك جونيور بعده يتعلم، أو شخص مو قوي بالكود بس عنده رؤية حلوة.

السينيور الذكي يسمع الكل، لأن يعرف إنو الحكمة مو بس من فوق تجي.

السينيور يشرح فكرته ببساطة

السينيور مو بس يعرف الشي، يعرف يشرحه.

تجي تسأله: "ليش استخدمنا هالـ architecture؟" يشرحلك ياها بلغة مفهومة، سواء كنت جونيور، QA، أو حتى Product Owner.

المعرفة الحقيقية هي إنك تبسّط المعقّد، مو تعقّد البسيط.

السينيور عنده تعاطف

أي نعم، تعاطف.

يعرف إنو إحنا بشر، نمر بأيام زينة وأيام صعبة.

زميله إذا سأل سؤال بسيط، ما يستهزئ، يجاوبه بروح طيبة.

يعرف إنو مو كل شخص يمشي بنفس السرعة، ويخلي مساحة للتعلّم.

السينيور يشيل مسؤولية، مو بس مهام

السينيور إذا شاف مشكلة، ما يقول: "مو شغلي".

يفكّر شلون يحلها، أو على الأقل يبلّغ بيها.

عنده إحساس بالمسؤولية، مو بس عن الكود، لكن عن المنتج، تجربة المستخدم، وعن الفريق كله.

هواي ناس تكتب "Senior" بلينكدإن، بس قليلين اللي فعلاً عايشين المعنى.

خلي نبدأ نعيد تعريف كلمة "سينيور"، مو بلقب، بس بالفعل.

زِين، شنو تحتاج حتى تصير سينيور حقيقي؟

١. مهارات التواصل

تشرح فكرتك بطريقة مفهومة

تسأل أسئلة ذكية بدون ما تحرج غيرك

تقدر تفهم الناس المختلفين عنك، وتتواصل وياهم حسب مستواهم

٢. التفكير التحليلي واتخاذ القرار

تعرف تحلل مشكلة وتفهم جذورها

تختار الحل المناسب مو بس اللي "يشتغل"

تتحمّل مسؤولية القرار حتى لو صار خطأ

٣. القيادة بدون سلطة

تلهم غيرك يشتغل، مو تأمرهم

تقدر تدير الفريق وقت الضغط بدون ما تنهار

تساعد زملاءك يتعلمون ويكبرون وياك

٤. التعاطف والذكاء العاطفي

تعرف شلون تدير مشاعرك ومشاعر غيرك

تتعامل بلُطف واحترام، حتى لو الموقف صعب

تبني أجواء عمل صحية وآمنة نفسياً

٥. المهارات التقنية العميقة

عندك فهم عميق للنظام ككل، مو بس الكود

تعرف توازن بين سرعة الإنجاز وجودة الحل

تبقى تتعلّم وتطوّر مهاراتك أول بأول

٦. التفكير بالمستخدم والمنتج

تفكر بتجربة المستخدم، مو بس بالوظيفة البرمجية

تفهم احتياجات البزنس وتربطها بالحل التقني

تحس إنك شريك حقيقي، مو بس منفّذ

الخلاصة

السينيور مو بس يعرف كود، السينيور يصنع فرق حقيقي.

يخلي الفريق أحسن، يخلي المنتج أنضج، ويخلي الأجواء أهدأ.

مو بلقب، بس بتصرفاته، وحضوره، وتعامله مع الناس.

بالأجزاء الجاية، راح نحچي عن:

1. شلون توصل فكرتك للكل بدون تعقيد
2. شلون تكون مِنتور فعّال
3. شلون تدير حوارات صعبة داخل الفريق
4. وشلون تبني حضور محترم بدون ما تكون متسلّط